يامل قلبٍ غاديٍ فيه لاهوب

من ضيقةٍ واسبابها سيد الاحباب


الجادل اللي سبّه النوم منهوب

خلا دموعي من على الخد سكّاب


اصبحت انا في صوب والقلب في صوب

من عقب ماقفى خاطري منه ماطاب


ولا اهتنيت بزاد ولا بمشــروب

هالك ظما عطشان من بعد ماغاب


غروٍ زها بالجنز مايلبس الثوب

ولا يعجبه لبس البراقع ولا حجاب


ياغايتي ومناي ياعز مطلــوب

ترى العمر دونك كما السم ينساب


ياكيف تنوي ذبحتي وانت رعبوب

منك اتمنّا الموت ياعذب الانياب


الكامل الله وانت مافيك عذروب

ياليتنا اقراب وانساب واصحاب


يابو جديلٍ فوق الامتان مسكوب

يسبا النواظر كنه للعين نهاب ؟


وشفايفٍ فيها الشهد كنّه يذوب

من ذاق منّه يشهد الله ماتاب


ولا العيون اللي بها الكحل مصبوب

من شافها من سكرة الموت ماهاب


يازين يارقه وياحلو ياسلوب

بعدك عذاب اقسى من طعون الاقراب


اقرب وشف حالي من الهجر مسلوب

حالي نحيل وشاب راسي وانا شاب


اصبح معي للهم كاتب ومندوب

يقفي الفرح ويدوّن الهم بكتاب


غديت كنّي للغرابيل مقضوب

انوح نوح اللي وجس قرصة الداب


ماتوب عنك ياهوى البال ماتوب

ماتوب عنّك لو على قطع الارقاب


لاصرت انا منّك مصوّب ومصيوب

وش لي ادور بين هالناس لاصحاب

مير اتصبر والقدر صار مكتوب

مكتوب لي درب المواجع والاتعاب


لامر لك طاري بكيتك ويادوو

تسابق الونات باسراب واسراب


لك في الحشا نارٍ من الهجر مشبوب

ماتنطفي الا لالتقى الناب بالناب


في داخلي لك يابعد حالي (قروب)

قلبي وروحي تنتظر من ترحاب

ارق علي والعمر والوقت محسوب

اخاف لايقفي وانا منك مرتاب


هيجنت لك قافي على لحن مسحوب

عل الجروح تطيب والجرح ماطاب


صابر على ظلمك مثل صبر ايوووب

لكن غديت من المقادير منصاب


اجامل وكني مع الناس مغصوب

لو قلت غيرك طاب لي صرت كذاب

ماعاد ينفعني تداوي ولا حبوب

قربك دواي ارجوك لاتقفل الباب


يابعد من حبيت يااحب محبووب

وش تستفيد من الجفا قلي الاسباب

ومالوم قلبي لي غدى فيه لاهوب

من يوم شافك مقفي ياسيد الاحباب


بحر المحبة

مشكور على هذه القصيد

تحياتي لك

العفووو
شكرا على المرور الكريم

بحر المحبة